今日喺元朗區議會交通運輸委員會會議上，我就天恩路近嘉恩街嘅行人過路處提出長遠安全改善建議，繼續跟進去年十二月嗰宗貨車剷上行人路嘅意外。該過路處位於「S」形急彎末端，駕駛者轉出彎位後隨即要面對交通燈同過路處，假如車速較高或收掣不及，確實存在一定風險，尤其嗰度經常有不少居民等候過馬路，情況值得正視。所以我建議將過路處向嘉恩街方向稍為移後，同時保留現有交通燈位置不變，咁樣可以令駕駛者一出彎更早察覺燈號變化，延長減速距離，而彎後多出一段短直路亦可作為緩衝，即使有輕微操控偏差亦有空間修正；此外，我亦建議喺安全島周邊加設防撞欄，進一步提升對等候過路行人嘅保護。

運輸署嘅書面回覆表示現場交通運作正常，現時已有合適標誌，並計劃加設「慢駛」道路標記。我明白署方可能喺資源運用上有實際考慮，亦可能認為YOHO WEST天榮站對出嘅過路處可以分擔部分人流，但正正隨住YOHO WEST陸續入伙，使用呢個過路處嘅居民只會愈嚟愈多，單靠路面標記始終未能從設計層面根本解決彎位緊接過路處嘅結構問題。因此，我喺會上正式向署方提出，希望佢哋能進一步進行安全評估，包括量度車速、彎位視距及翻查意外紀錄，同時就過路處後移同加裝防撞欄嘅方案做可行性研究，並安排實地會勘，等大家一齊到現場探討具體落實細節。我會繼續以建設性態度同部門溝通，推動務實可行嘅改善措施，期望最終能夠令居民過路更加安心。