今日喺房屋委員會會議上，我哋幾位元朗區議員正式向主席姚國威先生提交咗聯合文件，題為《建議討論風暴樺加沙期間頌富商場停車場安排混亂的議題》，好高興得到主席批准列入議程。

事緣係咁：根據我哋辦事處喺颱風過後收到嘅居民反映，頌富商場停車場喺颱風期間嘅管理問題，對居民日常生活及財產安全造成不小影響，情況有必要深入檢討及改善。

過量時租車進場導致月租車主無法泊車

暴風來臨前，不少時租車輛湧進頌富停車場避風。然而，停車場喺管理上未能妥善控制進場車輛嘅數量，導致車場內嘅泊車位被時租車輛佔滿，甚至可以用「過量」嚟形容。結果，原本有權使用停車場嘅月租車主竟然無法順利泊入停車場。

停車場內因泊位不足，有車輛泊喺行車道上，甚至橫跨其他已泊好嘅車位前，阻礙其他車輛正常出車。更有車輛一泊佔用兩個車位，令情況更加混亂，對停車場秩序構成嚴重影響。有天頌苑居民係月租車主，因為避開擋住其車位嘅亂停車輛時，不幸發生碰撞事故，導致車輛損壞。呢類事件嘅發生，不僅令居民感到失望，更顯示停車場管理上嘅缺失可能對居民財產安全造成危害。

我哋喺會上指出，風暴期間嘅停車場安排混亂不僅影響咗居民嘅日常生活，也暴露出停車場管理上嘅不足。我哋要求對此次事件中管理上嘅缺失進行全面檢討，並完善相關泊車管理機制，確保類似情況不再重演。我哋亦希望有關方面能重視居民嘅意見，召開會議深入討論此事，並督促相關管理機構作出改善，為居民提供更安全、有序嘅停車環境。

打風已經夠煩，仲要因為停車場管理混亂而搞到架車損壞，居民真係好無奈。我哋會繼續跟進管理機構嘅改善方案，確保同類事件唔會再發生。

#元朗區議會 #天水圍 #頌富商場 #停車場管理 #風暴樺加沙 #房屋委員會 #居民權益

聯絡人：元朗區議員 黃頴灝／譚德開／王曉山／林宗賢