今日喺社區參與及文化康樂委員會會議上，我正式向呂堅主席提交咗文件，題為《建議討論增加社區和學校的公民教育以配合都市固體廢物收費》，好高興得到主席批准列入議程。

事緣係咁：近日社會就都市固體廢物收費嘅討論眾多，市民基本上對政策欠缺充分認識。例如政策本身嘅原意、香港垃圾處理嘅問題及短板、回收分類嘅意識及知識嘅貧乏，都係影響到當局推行都市固體廢物收費嘅其中重大阻力。

參考其他國家和地區，喺推行都市固體廢物收費期間及之後，環保及源頭分類嘅教育都不停在社區及學校推行，以喺社區解釋畀市民政策原意及執行細節，而喺學校更有一套從少培養嘅環保及源頭分類教育。

我收到不少市民反映對都市固體廢物收費並不了解，不明白為何要做污者自付，而且不懂怎樣做源頭分類。例如：

那些紙張可回收？

飲料盒能否回收及怎樣回收？

可降解膠袋能否回收？

飲水樽是否有標籤紙就不能回收？

呢啲都係實實在在嘅問題，市民係不了解嘅。

我喺會上提出，希望部門考慮多在元朗嘅社區會堂、大會堂、學校等做環保教育及宣傳，喺學校推行源頭分類教育，參考外國經驗等，去培養下一代可持續發展嘅理念，讓小朋友都知道「青山綠水才是金山銀山」。

具體建議：
元朗嘅學校課外活動能否有系統地做環保及源頭分類元素嘅教育或文化表演，加入公民教育及話劇表演等元素。用生動有趣嘅方式，讓環保意識從小紮根，而唔係淨係派傳單、貼海報。

我喺會上強調，政策要成功，教育必須行先。市民唔係唔想做，而係唔識做、唔明白點解要做。如果政府淨係推出政策而唔做好配套教育，到頭來只會引起更多混亂同怨氣。我期望部門能夠採納建議，喺元朗區率先推行更全面嘅環保公民教育。

我會繼續跟進部門嘅回應同具體計劃。如果大家對都市固體廢物收費或環保教育有任何意見，歡迎隨時聯絡我。

#元朗區議會 #都市固體廢物收費 #環保教育 #源頭分類 #公民教育 #社區參與及文化康樂委員會