今日喺食物環境衞生委員會會議上，我哋幾位元朗區議員正式向湛家雄主席提交咗聯合文件，題為《善用本地綠色產能，加強元朗區廢紙回收》，好高興得到主席批准列入議程。

事緣係咁：屯門環保園新造紙漿廠已經投產，年處理能力逾70萬噸，足以消化全港每年約50萬噸廢紙，實現「本地廢紙、本地處理」。呢個係一個重大契機——以前我哋回收嘅廢紙要運去邊？而家有本地產能，問題就變成：我哋點樣先可以收到足夠嘅廢紙？

惟元朗區人口密集，回收配套可以再針對性改善，及加強元朗居民分類意識。喺下游處理工廠支持下，可大量回收原本被棄置嘅廢紙，善用綠色產能兼減輕堆填區負荷。

我哋喺會上提出以下具體建議：

一、增設回收點，簡化收集流程

喺公共屋邨、鄉郊垃圾站、街市及人流集中地，增設專用廢紙回收桶，標示清晰。

與紙漿廠及業界合作，試行定點直接運送，減少中轉環節。

二、加強教育，提升分類質素

製作簡明單張，列明可回收（乾淨紙皮、報紙）與不可回收（紙巾、濕紙、含膠紙）種類。

舉辦社區活動（如廠房參觀），讓居民親身了解廢紙「本地重生」過程。

三、推行獎勵，鼓勵源頭分類

試行回收積分換領小禮品計劃，以短期誘因培養習慣。

協助屋苑及商場申請政府資助，優化回收設施。

我哋喺會上強調，屯門造紙漿廠投產係香港回收業嘅一個轉捩點，但如果前端回收量跟唔上，產能就會白白浪費。元朗區人口密集，絕對有條件成為廢紙回收示範區。我哋期望短期內提升試點區域回收量，長遠將元朗打造成廢紙高回收示範區，配合本地產能，真正達致減廢目標。

我哋會繼續跟進環保署同相關部門嘅回應同落實計劃。如果大家對廢紙回收有任何意見，歡迎隨時聯絡我哋。

#元朗區議會 #天水圍 #廢紙回收 #本地回收 #源頭減廢 #環保園 #食物環境衞生委員會