今日喺元朗區議會大會會議上，我哋多位元朗區議員正式向主席胡天祐先生提交咗聯合文件，題為《就颱風雨季前關注區內樹木風險評估及管理安排》，好高興得到主席批准列入議程。

事緣係咁：近期我哋收到不少市民反饋，主要對區內樹木狀況嘅關注。近日嘅黃雨警報及隨之而來嘅暴風雨天氣，本區內出現咗多棵喬木傾斜及倒塌嘅情況，其中喺天恆邨嘅塌樹，更有居民聲稱因此受傷。颱風季節即將來臨，喺呢啲惡劣天氣下容易出現樹木損壞及倒塌嘅情況，存在安全隱患。

我哋有需要在颱風來臨之前採取適當措施保護呢啲樹木。鑑於此情況，我哋希望樹木管理辦事處和康文署可以參與會議討論，如何對該區嘅樹木，尤其係喬木，進行全面評估和檢查。呢個唔單止係為咗確保綠化環境嘅美觀和舒適，更係為咗保障社區居民嘅安全。

我哋喺會上提出以下建議討論事項：

一、邀請樹木辦派代表到區議會大會共商對策
喺風季前開始及期間派遣專業人員前往本區，根據樹木資料庫，對區內嘅樹木進行詳細檢查和風險評估。按現行署方嘅數據資料，能否提供喺元朗區有關樹木修葺／保養嘅優次或數目資料？

二、建議樹木風險評估「以地點為本」
為密集使用地區內（如高交通及行人流量地點）作樹木嘅健康狀況及潛在風險嘅評估。預計極端大雨或颱風等惡劣天氣將會持續影響本港，而估算本港倒樹情況會加劇，請問署方有什麼具體新措施回應？

三、即時處理安全隱患
如果區內有需要，溝通後應立即對傾斜或存在安全隱患嘅樹木進行修剪或移除，以防止可能出現嘅安全事故。

四、加強私人地方社區教育
針對私人地方如私人屋苑、居屋等加強社區教育，提高該處管理人對樹木風險評估及管理安排嘅認識。

我哋喺會上強調，維持樹木健康和社區安全係一項複雜且艱鉅嘅任務，需要各方合作和努力。我哋代表居民向部門表達謝意，部門喺六月黃雨後嘅一天，喺公共地方清理塌下嘅樹木效率很高。但我哋希望唔係部門事後清理樹木，而係事先喺密集使用地區超前部署，排除風險。

我哋會繼續跟進樹木辦同康文署嘅回應同具體部署。如果大家對區內樹木安全有任何意見，歡迎隨時聯絡我哋。

#元朗區議會 #天水圍 #樹木風險評估 #颱風雨季 #社區安全 #樹木辦 #康文署