今日喺集體運輸服務工作小組會議上，我哋幾位元朗區議員正式向劉桂容主席提交咗聯合文件，題為《天水圍B1轉乘免費安排的優化建議》，好高興得到主席批准列入議程。

事緣係咁：近期居民反映現時B1路線乘客由落馬洲回到天水圍聚星樓後，只能免費轉乘276A，其他路線如269B、269C、269D等則需另行付費，對天水圍北居民嘅出行便利性仍有改善空間。

我哋喺會上指出，天水圍北居民好多都係喺市區返工，每日來回已經好疲累，如果喺聚星樓轉車仲要額外畀錢，實在係加重咗生活負擔。B1作為跨境路線，乘客由落馬洲返嚟，理應可以順暢接駁到區內其他路線。

我哋建議九巴擴展B1嘅免費轉乘優惠範圍，讓聚星樓乘客可免費轉乘更多路線，惠及更多居民。同時，我哋喺會上強調，呢啲巴士路線屬於固有路線（沉沒成本），唔會增加九巴嘅運營成本，卻能有效提升居民嘅幸福感與獲得感，並引導更多人使用公共交通。

我哋促請九巴公司考慮居民需求並作出改善，共同提升天水圍交通便利性及生活質素。我哋期望相關部門能對呢啲問題給出明確答覆和計劃，並喺接下來嘅會議中能進一步討論呢個項目。

我會繼續跟進九巴嘅回應。如果大家對B1轉乘安排有任何意見，歡迎隨時聯絡我哋。

#元朗區議會 #天水圍 #B1轉乘 #九巴 #公共交通 #集體運輸服務工作小組