今日喺集體運輸服務工作小組會議上，我哋幾位元朗區議員正式向劉桂容主席提交咗聯合文件，題為《改善天榮站早上繁忙時間輕鐵班次問題》，好高興得到主席批准列入議程。

事緣係咁：近期居民反映天榮站早上繁忙時間輕鐵班次不足嘅問題。隨著YOHO WEST第一期住戶入住，尤其在0750至0815高峰時段，居民經常需要等候兩班或更多列車才能上車，車廂擠迫更導致碰撞事件頻發。未來隨著YOHO WEST第二期入伙，居民人數進一步增加，交通壓力將會更大，現有班次安排已經無法滿足需求。

我哋喺會上指出，早上繁忙時間係返工返學嘅黃金時段，等兩班車先上到，意味住遲到風險大增。有居民同我哋講，試過等足三班車，返到公司已經遲到，仲要被老闆鬧。呢啲情況喺2025年嘅香港，實在唔應該出現。

我哋建議港鐵立即增加早上繁忙時間嘅班次，特別是在高峰時段縮短班次間隔，並優先安排多一卡（2卡）列車以提升載客量。此外，港鐵應重新評估輕鐵運力，針對人口增長考慮優化路線或新增服務。

我哋喺會上強調，YOHO WEST第二期即將入伙，如果唔趁而家做好準備，到時情況只會更加惡劣。港鐵唔可以等到問題爆煲先嚟補鑊，必須超前部署，以民為本。

我哋期望相關部門能對呢啲問題給出明確答覆和計劃，並喺接下來嘅會議中能進一步討論呢個項目。我哋會繼續跟進港鐵嘅回應同改善措施。

如果大家對輕鐵班次有任何意見，歡迎隨時聯絡我哋。

#元朗區議會 #天水圍 #天榮站 #輕鐵班次 #港鐵 #YOHOWEST #集體運輸服務工作小組