今日喺集體運輸服務工作小組會議上，我哋幾位元朗區議員正式向劉桂容主席提交咗聯合文件，題為《改善嘉恩路K74站及班次和完善長者及照顧者候車設施》，好高興得到主席批准列入議程。

事緣係咁：我哋近日接獲多名栢慧豪園及周邊居民反映，位於嘉恩路嘅K74巴士站長期存在以下問題，對居民（尤其長者及需定期前往博愛醫院嘅乘客）造成不便：

班次疏落問題
K74巴士班次間隔平均長達30分鐘一班，上午至下午3時段更是60分鐘。居民若錯過班次，需於烈日或雨天下長時間等候，對長者、病患及攜帶物品嘅照顧者造成極大負擔。部分長者需轉乘多程交通工具前往博愛醫院覆診，班次不穩易導致遲到，影響就醫安排。

候車設施不足
K74巴士站及鄰近小巴站均未設置座椅，長者及行動不便者被迫站立苦候，甚至需自備折椅，違反「友善社區」原則。酷熱天氣下也容易令到長者候車時不適。

我哋喺會上提出以下建議討論事項：

一、評估班次調整可行性
請運輸署及港鐵巴士（如適用）評估K74路線嘅乘客流量及班次調整可行性。一條巴士線等成個鐘先有一班，仲要係去醫院嘅路線，對長者嚟講真係好唔方便。

二、加設座椅
希望在站內加設座椅，或短期在夏季前增設臨時座椅。而家連一張凳都冇，長者企喺度等成個鐘，酷熱天氣下真係好容易出事。

我哋喺會上強調，K74係栢慧豪園一帶居民前往博愛醫院嘅重要路線，使用者以長者同病患為主，班次疏落同缺乏座椅嘅問題必須正視。我哋期望相關部門能對呢啲問題給出明確答覆和計劃，並喺接下來嘅會議中能進一步討論呢個項目。

我哋會繼續跟進運輸署同港鐵巴士嘅回應。如果大家對K74巴士服務有任何意見，歡迎隨時聯絡我哋。

#元朗區議會 #天水圍 #K74 #嘉恩路 #栢慧豪園 #長者友善 #博愛醫院 #集體運輸服務工作小組