今日喺集體運輸服務工作小組會議上，我哋幾位元朗區議員正式向劉桂容主席提交咗聯合文件，題為《建議討論增加天水圍將軍澳繁忙時段的交通安排》，好高興得到主席批准列入議程。

事緣係咁：隨著2025年多個政府部門遷入將軍澳新辦公大樓，我哋辦事處收到不少天水圍居民反映關於天水圍將軍澳交通安排嘅訴求。目前天水圍與將軍澳之間缺乏直達交通服務，居民被迫依賴多次轉乘嘅出行方式，此類路線不僅耗時冗長，單程動輒耗費100分鐘或兩小時，每日往返通勤時間更超過3小時，對居民嘅工作效率、家庭生活及身心健康造成沉重負擔，嚴重影響家庭團聚與社區生活參與。

我哋喺會上指出，有居民同我哋講，每日朝早六點幾出門，夜晚八九點先返到屋企，見到仔女嘅時間少之又少。呢個唔係個別例子，而係好多天水圍跨區工作居民嘅日常寫照。

為切實回應居民訴求，我哋懇請委員會推動以下討論：可否考慮任何方案，例如開設天水圍直達將軍澳嘅特別巴士專線。 路線可規劃為天水圍（天水圍公共交匯處）經元朗公路、新田公路直入大老山隧道，再經將軍澳隧道抵達將軍澳市中心，全程避開非必要繞行區域。服務應優先覆蓋工作日早晚高峰時段（上午6:30-8:30往將軍澳；下午5:30-7:30返天水圍），初期以20分鐘一班試辦，並依據客流量靈活調整班次。

我哋喺會上強調，此方案參考咗九巴跨區夜班線嘅成功經驗，具備運營可行性及可能可優化現有轉乘配套。新政府辦公大樓啟用後，跨區通勤需求將大幅攀升，增設直達路線預計可縮短單程時間至75分鐘內，每日為居民節省不少時間，更能促進「北部都會區」與「將軍澳創科走廊」嘅人才流動，呼應政府區域協同發展策略。

我哋會繼續跟進運輸署同巴士公司嘅回應。如果大家對天水圍至將軍澳交通有任何意見，歡迎隨時聯絡我哋。

#元朗區議會 #天水圍 #將軍澳 #跨區巴士 #公共交通 #北部都會區 #集體運輸服務工作小組